മാത്‌സ് ബ്ലോഗിന്റേയും തീരാനഷ്ടം.

മാത്‌സ് ബ്ലോഗിന്റെ സഹചാരിയും എറണാകുളം ജില്ലയിലെ നോര്‍ത്ത് പറവൂര്‍ സമൂഹം ഹൈസ്‌ക്കൂളിലെ ഗണിതശാസ്ത്രാധ്യാപകനുമായ ജയശങ്കര്‍ സാര്‍ (42) ഇന്നലെ രാത്രി 8.30 ഓടെ നമ്മെ വിട്ടുപിരിഞ്ഞു. ഇന്ന് രാവിലെ 11 ന്‌ സ്വവസതിയില്‍ സംസ്കാരം നടന്നു.എറണാകുളം ജില്ലയിലെ പറവൂരിനടുത്ത് ചേന്ദമംഗലം എന്ന സ്ഥലത്താണ് അദ്ദേഹത്തിന്റെ താമസം.മാത്‍സ്ബ്ലോഗിന്റെ ആദ്യകാലങ്ങളില്‍ ദിവസവും ബ്ലോഗ് സന്ദര്‍ശിക്കുകയും അതിരാവിലേ തന്നെ ഡിസ്ക്കഷനുകള്‍ക്ക് തുടക്കമിടുകയും ചെയ്യാറുണ്ടായിരുന്നൂ. കൊച്ചി യൂണിവേഴ്സിറ്റിയിലെ മാത്തമാറ്റിക് ഒളിമ്പ്യാഡുമായി ബന്ധപ്പെട്ട വെബ്പേജ് ഡിസൈന്‍ ചെയ്തതും അദ്ദേഹമായിരുന്നു. നന്നേ ചെറുപ്രായത്തിലേ തന്നെ പറവൂര്‍ സമൂഹം ഹൈസ്ക്കൂളിലെ ഗണിതാധ്യാപകനായി അദ്ദേഹം ജോലിയില്‍ പ്രവേശിച്ചു. ഇരുപത്തിരണ്ടാം വയസ്സില്‍ ഡി.ആര്‍.ജിയായ അദ്ദേഹം തുടര്‍ന്നങ്ങോട്ട് ഒട്ടേറെ കോഴ്സുകള്‍ നയിച്ചു. ഒരുകാലത്ത് ഗണിതശാസ്ത്രമേളകളുടെ സജീവ സാന്നിധ്യമായിരുന്ന അദ്ദേഹം രോഗസംബന്ധമായ അവശതകളിലും, ഗണിതത്തോടുള്ള ആഭിമുഖ്യം കൈവിട്ടിരുന്നില്ല. അദ്ദേഹത്തിന്റെ വിയോഗത്തില്‍ അഗാധമായ അനുശോചനം രേഖപ്പെടുത്തുന്നു.