ഓണക്കാഴ്ചയായി "കാഴ്ച"

>> Thursday, August 30, 2012

വയനാട് ജില്ലയിലെ  കബനിഗിരി നിര്‍മ്മല ഹൈസ്ക്കൂള്‍ വിക്കി ഗ്രന്ഥശാലയിലേക്ക് കുന്ദലത എന്ന കൃതി ഉള്‍പ്പെടുത്തിയതിനെക്കുറിച്ചുള്ള പോസ്റ്റ് ഓര്‍ക്കുന്നുണ്ടാകുമല്ലോ? വിദ്യാര്‍ത്ഥികള്‍ ചേര്‍ന്ന് ആ കൃതി ടൈപ്പ് ചെയ്ത് വിക്കി ഗ്രന്ഥശാലയിലുള്‍പ്പെടുത്തിയത് തലമുറകള്‍ക്ക് ഗുണകരമാകുമെന്നതില്‍ സംശയിക്കാനില്ല.

കബനിഗിരിയുടെ ഈ വര്‍ഷത്തെ പ്രൊജക്ട് - കാഴ്ച

ഈ വിദ്യാലയത്തിലെ വിദ്യാര്‍ത്ഥികളും അധ്യാപകരും ഇത്തവണ ഓണക്കാഴ്ചയൊരുക്കിയത് ഒരു ഓണ്‍ലൈന്‍ മാഗസിന്‍ തയ്യാറാക്കിക്കൊണ്ടാണ്. "കാഴ്ച"യെന്നാണിതിന്റെ പേര്. 35 പേജുള്ള ഒരു ഡിജിറ്റല്‍ മാഗസിനാണ് "കാഴ്ച". ഒരു പുസ്തകം പോലെ താളുകള്‍ മറിച്ച് നമുക്ക് കുട്ടികളുടെ സൃഷ്ടികള്‍ വായിക്കാം. പുസ്തകത്തിലെ പേജുകള്‍ വലുതാക്കിയും ചെറുതാക്കിയുമെല്ലാം കാഴ്ച ആസ്വദിക്കാവുന്നതേയുള്ളു. സൃഷ്ടികള്‍ ടൈപ്പു ചെയ്തെടുത്തതും വെബ്ഡിസൈനിങ്ങ് നടത്തിയതുമെല്ലാം കുട്ടികള്‍ തന്നെ. ചുരുക്കത്തില്‍ വായനയുടെ ഒരു പുതിയ തലം നമുക്കു മുന്നിലേക്ക് അവതരിപ്പിക്കുകയാണ് കബനിഗിരിയിലെ വിദ്യാര്‍ത്ഥികളും അധ്യാപകരും.

കാഴ്ചയെന്ന ഓണ്‍ലൈന്‍ മാഗസിന്റെ ഉദ്ഘാടനം വയനാട് ജില്ലാ IT കോര്‍ഡിനേറ്റര്‍ തോമസ്സ് മാസ്റ്റര്‍ നിര്‍വ്വഹിച്ചു. കുട്ടികള്‍ സ്വന്തമായി അവരുടെ സൃഷ്ടികള്‍ ടൈപ്പ് ചെയ്ത് അപ്‌ലോഡ് ചെയ്യാന്‍ സഹായിച്ചത് കഴിഞ്ഞ വര്‍ഷത്തെ sslc ബാച്ചിലെ വെബ്‌ ഡിസൈനര്‍മാരാണ്. മാഗസിന്റെ അടുത്ത ലക്കവും പ്രസിദ്ധീകരിക്കാനാണ് കുട്ടികള്‍ ശ്രമിക്കുന്നത്.ഇത് അപ്‌ലോഡ് ചെയ്തിട്ടുള്ളത് വയനാട് ജില്ലാ വിദ്യാഭ്യാസപോര്‍ട്ടല്‍ അറിവിടത്തിലാണ്.
കാഴ്ച കാണണ്ടേ..? ഇവിടെ ക്ലിക്ക് ചെയ്യൂ..
പിന്‍കുറി :
കാഴ്ചയുടെ ആദ്യലക്കം ഏതാണ്ട് ഒരു മാസം മുന്നേ കണ്ടിരുന്നു. എന്നാല്‍ വളരെ പ്രൊഫഷണലായി പുറത്തു നിന്നാരോ ചെയ്തതാണെന്നാണ് കരുതിയത്. എന്നാല്‍ സ്കൂളിന്റെ അഭിമാനങ്ങളായ കുട്ടികളാണിത് ഡിസൈന്‍ ചെയ്തതെന്നറിയാന്‍ വൈകി. മധുസാറിനോട് ഒരു ചെറിയ ക്ഷമാപണം.


Read More | തുടര്‍ന്നു വായിക്കുക

കെ ടെറ്റ് പരീക്ഷയെഴുതുന്നതിന് മുമ്പേ അറിയാന്‍

>> Thursday, August 23, 2012

സംസ്ഥാനത്ത് ആദ്യമായി നടത്തുന്ന അധ്യാപക യോഗ്യതാ പരീക്ഷ (ടെറ്റ്) 25നു തുടങ്ങാനിരിക്കേ, ചില കാര്യങ്ങള്‍ പ്രത്യേകം ശ്രദ്ധിച്ചു പരീക്ഷ എഴുതിയില്ലെങ്കില്‍ യോഗ്യതയ്ക്കു പകരം അയോഗ്യതയായിരിക്കും ഫലം. വിദ്യാഭ്യാസ ഗവേഷണ സ്ഥാപനമായ എസ്സിഇആര്‍ടിക്കുവേണ്ടി പരീക്ഷാഭവന്‍ ആണ് പരീക്ഷ നടത്തുന്നത്. ആദ്യമായി നടത്തുന്ന യോഗ്യതാ പരീക്ഷ ആയതിനാലും പല മേഖലകളിലുള്ളവര്‍ക്കു പലതരം ചോദ്യങ്ങള്‍ ഉപയോഗിക്കുന്നതിനാലും നിര്‍ദേശങ്ങള്‍ പ്രത്യേകം ശ്രദ്ധിച്ച് പിഴവു വരുത്താതെ എഴുതണം. ഇതേക്കുറിച്ചുള്ള കൂടുതല്‍ വിവരങ്ങള്‍ ചുവടെ നല്‍കിയിരിക്കുന്നു. എല്‍പി വിഭാഗത്തിലെ അധ്യാപകര്‍ക്കായുള്ള ടെറ്റ് 25നും യുപി വിഭാഗത്തിലെ അധ്യാപകര്‍ക്കുള്ള ടെറ്റ് 27നും ഹൈസ്കൂള്‍ അധ്യാപകര്‍ക്കായുള്ള ടെറ്റ് സെപ്റ്റംബര്‍ ഒന്നിനുമാണു നടത്തുന്നത്. എല്ലാ ദിവസവും രാവിലെ 10.30 മുതല്‍ 12 വരെയാണു പരീക്ഷ.

മൂന്നു പരീക്ഷകള്‍ക്കുമായി 1,61,856 അപേക്ഷകരുണ്ട്. ഒഎംആര്‍ രീതിയിലുള്ള പരീക്ഷ ആയതിനാല്‍ കോപ്പിയടി ഒഴിവാക്കുന്നതിനു ചോദ്യക്കടലാസ് എ, ബി, സി, ഡി എന്നിങ്ങനെ നാലു സെറ്റായിട്ടാണു തയാറാക്കിയിരിക്കുന്നത്. ഓരോ സെറ്റില്‍പ്പെട്ട ചോദ്യക്കടലാസിനും മൂന്നു ഭാഗങ്ങള്‍വീതം ഉണ്ടാകും. ഓരോ ഭാഗത്തിനും പ്രത്യേക ചോദ്യക്കടലാസ് ആയിരിക്കും. മൂന്നു ചോദ്യക്കടലാസും ഒരേ സെറ്റില്‍പ്പെട്ടത് ആണെന്നു പരീക്ഷയെഴുതുന്നതിനു മുന്‍പ് ഉറപ്പുവരുത്തണം. ഉദാഹരണത്തിന് 'എ സെറ്റാണു ലഭിക്കുന്നതെങ്കില്‍ മൂന്നു ചോദ്യക്കടലാസിലും 'എ എന്നു രേഖപ്പെടുത്തിയിട്ടുണ്ടോയെന്നു നോക്കണം. ഇല്ലെങ്കില്‍ അധികൃതരുടെ ശ്രദ്ധയില്‍പ്പെടുത്തി അതേ സെറ്റില്‍പ്പെട്ട ചോദ്യക്കടലാസ് വാങ്ങണം.

ആകെ ചോദ്യങ്ങള്‍ 150
മൂന്നു ഭാഗങ്ങള്‍ ചേര്‍ന്ന ഒരു ചോദ്യക്കടലാസില്‍ 150 ചോദ്യങ്ങളാണ് ഉണ്ടാവുക. ഓരോ ചോദ്യത്തിനും നാല് ഉത്തരങ്ങള്‍ നല്‍കിയിരിക്കും. അതില്‍നിന്നു ശരിയായ ഉത്തരം തിരഞ്ഞെടുത്ത് ഒഎംആര്‍ ഷീറ്റില്‍ രേഖപ്പെടുത്തണം. എല്‍പി വിഭാഗക്കാരുടെ പരീക്ഷയ്ക്ക് ഒന്നുമുതല്‍ 90 വരെയുള്ള ചോദ്യങ്ങളായിരിക്കും ആദ്യഭാഗം. ഇതില്‍ ഒന്നുമുതല്‍ 30 വരെ ചോദ്യങ്ങള്‍ കുട്ടികളുടെ വ്യക്തിത്വ വികാസവും അധ്യാപന ശാസ്ത്രവുമായി ബന്ധപ്പെട്ടതായിരിക്കും. 31 മുതല്‍ 60 വരെ ചോദ്യങ്ങള്‍ കണക്കില്‍നിന്നും 61 മുതല്‍ 90 വരെ ചോദ്യങ്ങള്‍ എന്‍വയണ്‍മെന്റല്‍ സയന്‍സില്‍നിന്നുമായിരിക്കും.

എല്‍പി വിഭാഗക്കാരുടെ ചോദ്യക്കടലാസിന്റെ രണ്ടാമത്തെ ഭാഗത്തു 91 മുതല്‍ 120 വരെയുള്ള ചോദ്യങ്ങളാണ് ഉള്‍പ്പെടുത്തിയിരിക്കുന്നത്. പരീക്ഷാര്‍ഥിയുടെ ആശയവിനിമയപാടവം അളക്കുന്നതിനാണ് ഈ വിഭാഗം. മലയാളം, തമിഴ്, കന്നഡ മാധ്യമങ്ങളിലുള്ള ആശയവിനിമയ പാടവമാണ് അളക്കുക. മൂന്നു ഭാഷക്കാര്‍ക്കായി മൂന്നു തരത്തിലുള്ള ചോദ്യക്കടലാസ് ആയിരിക്കും നല്‍കുക. 121 മുതല്‍ 150 വരെയുള്ള ചോദ്യങ്ങളാണു മൂന്നാം ഭാഗം. എല്‍പിയില്‍ ഇംഗിഷും അറബിക്കും പഠിപ്പിക്കണമെന്നതിനാല്‍ രണ്ടു ഭാഷയിലുമുള്ള ജ്ഞാനമാണു മൂന്നാം ഭാഗത്തില്‍ പരിശോധിക്കുക. പരീക്ഷാര്‍ഥി തിരഞ്ഞെടുത്ത ഭാഷയിലുള്ള ചോദ്യക്കടലാസ് ലഭിക്കും.

യുപി വിഭാഗത്തില്‍പ്പെട്ട അധ്യാപകര്‍ക്കുള്ള ചോദ്യക്കടലാസിനും മൂന്നു ഭാഗമുണ്ട്. ആദ്യഭാഗത്തില്‍ ഒന്നുമുതല്‍ 90 വരെ ചോദ്യങ്ങള്‍ ഉണ്ടാകും. ഇതില്‍ ഒന്നുമുതല്‍ 30 വരെ ചോദ്യങ്ങള്‍ കുട്ടികളുടെ വ്യക്തിത്വ വികാസവും അധ്യാപന ശാസ്ത്രവുമായി ബന്ധപ്പെട്ടതാണ്. 31 മുതല്‍ 90 വരെ ചോദ്യങ്ങള്‍ സയന്‍സ്, കണക്ക് എന്നിവയില്‍നിന്നും സോഷ്യല്‍ സയന്‍സില്‍നിന്നുമായിരിക്കും. സോഷ്യല്‍ സയന്‍സുകാര്‍ ആ വിഷയത്തില്‍നിന്നുള്ള ചോദ്യങ്ങള്‍ക്കാണ് ഉത്തരം എഴുതേണ്ടത്. ചോദ്യക്കടലാസിന്റെ രണ്ടാം ഭാഗത്തില്‍ 91 മുതല്‍ 120 വരെ ചോദ്യങ്ങളാണുള്ളത്. അധ്യയന മാധ്യമത്തിലുള്ള ആശയവിനിമയ പാടവമാണ് ഇതില്‍ വിലയിരുത്തുക. മലയാളം, ഇംഗിഷ്, തമിഴ്, കന്നഡ എന്നിവയിലുള്ള പ്രത്യേക ചോദ്യക്കടലാസുകളുണ്ടാകും. 95% പേരും മലയാളത്തിലും ഇംഗിഷിലുമാണ് എഴുതുന്നത്. 121 മുതല്‍ 150 വരെ ചോദ്യങ്ങള്‍ അടങ്ങുന്ന മൂന്നാം ഭാഗത്തില്‍ മലയാളം, ഇംഗിഷ്, ഹിന്ദി, അറബിക്, ഉറുദു, സംസ്കൃതം എന്നീ ഭാഷകളിലുള്ള ജ്ഞാനം വിലയിരുത്തും. ഇതിനായി പ്രത്യേകം ചോദ്യക്കടലാസുകള്‍ തയാറാക്കിയിട്ടുണ്ട്.

ഹൈസ്കൂള്‍ അധ്യാപകര്‍ക്കായുള്ള ടെറ്റിന്റെ ചോദ്യക്കടലാസിന്റെ ഒന്നാം ഭാഗത്തില്‍ ഒന്നുമുതല്‍ 40 വരെ ചോദ്യങ്ങളാണ് ഉണ്ടാവുക. മനശ്ശാസ്ത്രം, ബോധന സിദ്ധാന്തങ്ങള്‍, അധ്യാപന അഭിരുചി എന്നിവ സംബന്ധിച്ച ചോദ്യങ്ങളാണ് ആദ്യഭാഗത്ത് ഉള്‍പ്പെടുത്തുന്നത്. ചോദ്യക്കടലാസിന്റെ രണ്ടാം ഭാഗത്തു 41 മുതല്‍ 70 വരെ ചോദ്യങ്ങളുണ്ടാകും. മലയാളം, ഇംഗിഷ്, തമിഴ്, കന്നഡ മാധ്യമങ്ങളിലുള്ള ആശയവിനിമയ പാടവമാണ് ഈ ഭാഗത്തു പരിശോധിക്കുക. ചോദ്യക്കടലാസിന്റെ മൂന്നാം ഭാഗത്ത് 71 മുതല്‍ 150 വരെ ചോദ്യങ്ങളുണ്ട്. അധ്യാപകന്‍ പഠിച്ച 12 വിഷയത്തില്‍നിന്നുള്ള ചോദ്യങ്ങളായിരിക്കും ഇത്. മലയാളം, ഇംഗിഷ്, ഹിന്ദി, അറബിക്, ഉറുദു, സംസ്കൃതം, തമിഴ്, കന്നഡ, സോഷ്യല്‍ സയന്‍സ്, ഫിസിക്കല്‍ സയന്‍സ്, നാച്ചുറല്‍ സയന്‍സ്, കണക്ക് എന്നിവയാണു വിഷയങ്ങള്‍. ഇതിനായി 12 തരം ചോദ്യക്കടലാസ് തയാറാക്കിയിട്ടുണ്ട്. ഈ വിഭാഗത്തില്‍ 80 ചോദ്യങ്ങളുണ്ട്. ഇതില്‍ 50 എണ്ണം വിഷയത്തിലുള്ള ജ്ഞാനം അളക്കുന്നതിനും 30 എണ്ണം വിഷയം കുട്ടികള്‍ക്ക് എങ്ങനെ പകര്‍ന്നുകൊടുക്കും എന്നതിനെക്കുറിച്ചുമാണ്.

പരീക്ഷയ്ക്ക് 9.45ന് എത്തണം
രാവിലെ 10.30നാണ് പരീക്ഷ തുടങ്ങുകയെങ്കിലും എല്ലാവരും 9.45നുതന്നെ ഹാളില്‍ എത്തണം. അപ്പോള്‍ത്തന്നെ ഒഎംആര്‍ ഷീറ്റ് നല്‍കും. മൂന്നു ദിവസത്തെ പരീക്ഷകള്‍ക്കു മൂന്നു നിറത്തിലുള്ള ഒഎംആര്‍ ഷീറ്റുകളാണ് ഉപയോഗിക്കുന്നത്. ഒഎംആര്‍ ഷീറ്റിന്റെ ആദ്യപേജില്‍ ഉത്തരം അടയാളപ്പെടുത്തിയാല്‍ രണ്ടാമത്തെ പേജിലും അതു പതിയും. പരീക്ഷ കഴിയുമ്പോള്‍ രണ്ടാമത്തെ പേജ് പരീക്ഷാര്‍ഥിക്കു വീട്ടില്‍ കൊണ്ടുപോകാം. എന്നാല്‍, ചോദ്യക്കടലാസുകള്‍ തിരികെ നല്‍കണം. പരീക്ഷയ്ക്കു നെഗറ്റീവ് മാര്‍ക്ക് ഇല്ല. നീലയോ കറുപ്പോ നിറത്തിലുള്ള ബോള്‍ പോയിന്റ് പേനയാണ് ഒഎംആര്‍ ഷീറ്റില്‍ ഉത്തരങ്ങള്‍ രേഖപ്പെടുത്താന്‍ ഉപയോഗിക്കേണ്ടത്.

ഒഎംആര്‍ ഷീറ്റ് മായിക്കുകയോ ഒരുതവണ എഴുതിയതിനു മുകളില്‍ വീണ്ടും എഴുതുകയോ മുറിക്കുകയോ മടക്കുകയോ ചെയ്യാന്‍ പാടില്ല. നിര്‍ദേശിച്ചിരിക്കുന്ന കാര്യങ്ങളല്ലാതെ മറ്റൊന്നും ഒഎംആര്‍ ഷീറ്റില്‍ രേഖപ്പെടുത്തരുത്. അങ്ങനെ ചെയ്താല്‍ ഷീറ്റ് റദ്ദാക്കും. ചോദ്യക്കടലാസിലെയും ഒഎംആര്‍ ഷീറ്റിലെയും നിര്‍ദേശങ്ങള്‍ ശ്രദ്ധാപൂര്‍വം വായിച്ചശേഷമേ പരീക്ഷ എഴുതാവൂ. പരീക്ഷാ ഹാളില്‍ ഇലക്ട്രോണിക് ഉപകരണങ്ങള്‍, കാല്‍ക്കുലേറ്റര്‍, ലോഗരിതം ടേബിള്‍ തുടങ്ങിയവ അനുവദിക്കില്ല. അപേക്ഷയില്‍ നല്‍കിയ വിഷയത്തില്‍ത്തന്നെ പരീക്ഷ എഴുതണമെന്നു നിര്‍ബന്ധമാണ്. പിശകു സംഭവിച്ചതിന്റെ പേരില്‍ ഇനി വിഷയം മാറ്റാന്‍ ആരെയും അനുവദിക്കില്ല.

പരീക്ഷ തുടങ്ങുന്നതിനു 10 മിനിറ്റ് മുന്‍പു ചോദ്യക്കടലാസിന്റെ ആദ്യഭാഗം നല്‍കും. 10.30നു സീല്‍ പൊട്ടിച്ചു നോക്കാം. ആദ്യഭാഗത്തിലെ സീരിയല്‍ നമ്പരാണ് ഒഎംആര്‍ ഷീറ്റില്‍ എഴുതേണ്ടത്. തുടര്‍ന്നു ചോദ്യക്കടലാസിന്റെ രണ്ടും മൂന്നും ഭാഗങ്ങള്‍കൂടി പരീക്ഷാര്‍ഥികള്‍ക്കു നല്‍കും. അവര്‍ക്ക് ഇഷ്ടംപോലെ ഏതു ഭാഗത്തിന്റെ ഉത്തരങ്ങള്‍ വേണമെങ്കിലും എഴുതിത്തുടങ്ങാം. മൂന്നു ഭാഗങ്ങളും ഒരേ സെറ്റില്‍പെട്ടതാണെന്ന് ഉറപ്പുവരുത്തിയിട്ടേ എഴുതാവൂ. കേടുവന്ന ഒഎംആര്‍ ഷീറ്റുകളും ചോദ്യക്കടലാസും മാറ്റി നല്‍കും. പരീക്ഷ തുടങ്ങി ഓരോ അരമണിക്കൂര്‍ കൂടുമ്പോഴും മണി അടിക്കും. വൈകിയെത്തുന്നവരെ 11 വരെ പരീക്ഷയ്ക്കു കയറാന്‍ അനുവദിക്കും. പരീക്ഷ എഴുതിത്തുടങ്ങിയാല്‍ 12 മണി കഴിയാതെ ആരെയും പുറത്തു വിടില്ല.

ഉത്തരസൂചികയില്‍ പരാതിയുണ്ടെങ്കില്‍ അറിയിക്കാം
ടെറ്റ് അവസാനിച്ചശേഷം സെപ്റ്റംബര്‍ നാലോടെ മൂന്നു പരീക്ഷയുടെയും ഉത്തരസൂചിക പ്രസിദ്ധീകരിക്കും. ഇതു പരീക്ഷാര്‍ഥികള്‍ക്കു പരിശോധിച്ചശേഷം ആക്ഷേപമുണ്ടെങ്കില്‍ പരാതി നല്‍കാം. ഇതിന്റെ വിശദാംശങ്ങള്‍ പിന്നീട് അറിയിക്കും. ഉത്തരസൂചിക സംബന്ധിച്ച പരാതികള്‍ വിദഗ്ധ സമിതി പരിശോധിച്ചശേഷം സൂചികയില്‍ മാറ്റം വരുത്തണമോയെന്നു തീരുമാനിക്കും. അതിന്റെ അടിസ്ഥാനത്തിലായിരിക്കും മൂല്യനിര്‍ണയം. സെപ്റ്റംബര്‍ അവസാനത്തോടെ ഫലം വരുമെന്നു പ്രതീക്ഷിക്കുന്നു.

അന്ധര്‍ക്ക് സഹായി
എഴുനൂറോളം അന്ധര്‍ ടെറ്റ് എഴുതുന്നുണ്ട്. ഇവര്‍ക്കു സഹായികളായി പ്ളസ് ടു വിദ്യാര്‍ഥികളെയാണു നിശ്ചയിച്ചിരിക്കുന്നത്. സഹായിയുടെ വിജ്ഞാനം പരീക്ഷാര്‍ഥിക്കു പ്രയോജനപ്പെടാതിരിക്കാനാണിത്. പരീക്ഷാര്‍ഥിതന്നെ സഹായിയെ കണ്ടെത്തുകയും ഫോട്ടോ വച്ച് അപേക്ഷ നല്‍കുകയും വേണം. ഇയാള്‍ പ്ളസ് ടു വിദ്യാര്‍ഥിയാണെന്നു തെളിയിക്കാന്‍ ഫോട്ടോയില്‍ പ്രിന്‍സിപ്പല്‍ അറ്റസ്റ്റ് ചെയ്യണം. ഇതിനുള്ള ഫോം വെബ്സൈറ്റിലുണ്ട്. ഇതേവരെ സഹായിയെ ലഭിക്കാത്തവര്‍ പരീക്ഷാകേന്ദ്രത്തിന്റെ മേധാവിയുമായി ബന്ധപ്പെട്ടാല്‍ ആളിനെ ഏര്‍പ്പെടുത്തിക്കൊടുക്കും. സഹായിയെ ലഭിക്കുന്നതിനുള്ള അപേക്ഷകള്‍ ഇനി ഡിഇഒയ്ക്കു നല്‍കിയാല്‍ മതിയാകും. മൂന്നു ദിവസങ്ങളിലായി നടക്കുന്ന ടെറ്റ് സംബന്ധിച്ച എല്ലാ കാര്യങ്ങളിലും അന്തിമതീരുമാനം എടുക്കുക പരീക്ഷാഭവന്‍ സെക്രട്ടറിയായിരിക്കും.

ഹാള്‍ ടിക്കറ്റ്
ടെറ്റ് എഴുതുന്നതിനുള്ള ഹാള്‍ ടിക്കറ്റ് ഓണ്‍ലൈനിലൂടെ ലഭിക്കുന്നതിന് യൂസര്‍ ഐഡി, ചെലാന്‍ നമ്പര്‍ തുടങ്ങിയവ നല്‍കണം. എന്നാല്‍, ചെലാന്‍ കളഞ്ഞുപോയതായി ചിലര്‍ പരീക്ഷാഭവനില്‍ പരാതിപ്പെട്ടിട്ടുണ്ട്. എല്ലാ അപേക്ഷകരുടെയും റജിസ്റ്റര്‍ നമ്പര്‍ അവരുടെ മൊബൈല്‍ ഫോണിലേക്കു മെസേജ് ആയി മൂന്നു ദിവസത്തിനകം അയയ്ക്കും. ആ നമ്പര്‍ ഉപയോഗിച്ചു വെബ്സൈറ്റില്‍ കയറിയാല്‍ ഹാള്‍ ടിക്കറ്റ് എടുക്കാം. മൂന്നു പരീക്ഷയാണു നടത്തുന്നത് എന്നതിനാല്‍ മൂന്നു ഹാള്‍ ടിക്കറ്റ് ഉണ്ടാകും. ഒന്നിലേറെ പരീക്ഷയെഴുതുന്നവര്‍ ഓരോ പരീക്ഷയ്ക്കും പ്രത്യേകം ഹാള്‍ ടിക്കറ്റ് എടുക്കണം. ടെറ്റ് ഒന്നിനു 43,558 പേരും രണ്ടിന് 62,840 പേരും മൂന്നിന് 55,458 പേരുമാണ് അപേക്ഷിച്ചിരിക്കുന്നത്.

കടപ്പാട്
റെഞ്ചി കുര്യാക്കോസ്
മലയാള മനോരമ
K TET-I Model Exam | K TET-II
(KSTA Academic Council, Palakkad) Thanks to Manu Chandran

K TET FAQ (In malayalam)

K-TET Syllabus I , Syllabus 2, Syllabus 3

K-TET Sample Questions 1, Sample Questions 2, Sample Questions 3


Read More | തുടര്‍ന്നു വായിക്കുക

'ഉസ്കൂളു'കളുടെ സംരക്ഷണം - ഒരു പരുത്തിപ്പുള്ളി മാതൃക

>> Sunday, August 19, 2012

പരുത്തിപ്പുള്ളി എ എല്‍ പി സ്കൂള്‍ 2012-13 ല്‍ നൂറാംവര്‍ഷത്തിന്റെ നിറവിലാണ്.അതിലിത്ര വാര്‍ത്താ പ്രാധാന്യമെന്തിരിക്കുന്നു എന്നാണോ ആലോചിക്കുന്നത്? ഉണ്ടല്ലോ..!
പരുത്തിപ്പുള്ളി എന്നു കേള്‍ക്കുമ്പോള്‍ തന്നെ നമുക്ക് ഒരു ഗുരുവിനേയും ശിഷ്യയേയും ഓര്‍മ്മവരും - കണ്ണന്‍സാറും, ശിഷ്യ ഹിതയും. പാലക്കാട് ജില്ലയിലെ പെരുങ്ങാട്ടുകുറിശ്ശി ഗ്രാമ പഞ്ചായത്തിലെ പരുത്തിപ്പുള്ളിഗ്രാമത്തിലെ എ എല്‍ പി സ്കൂളില്‍ പഠിച്ചുവളര്‍ന്ന പ്രഗത്ഭരുടെ  നീണ്ട നിരയിലെ ഇങ്ങേയറ്റത്തെ കണ്ണികള്‍ ആണ് പാലക്കാട് ബ്ലോഗ്‌ ടീമിലെ പലരും . നാടിന്റെ സ്വത്തായ ആ പൊതുവിദ്യാലയം സംരക്ഷിക്കാനും ശക്തിപ്പെടുത്താനും ആ ഗ്രാമം മുഴുവന്‍ രംഗത്തുവന്നിരിക്കുകയാണ്. എല്ലാ മാസവും മുന്നാസൂത്രണത്തോടെയുള്ള വിവിധ പരിപാടികളോടെയാണ് ഒരു വര്‍ഷം നീളുന്ന ആഘോഷപരിപാടികള്‍ സംഘടിപ്പിച്ചിരിക്കുന്നത്.

സ്വാതന്ത്ര്യ ദിനത്തില്‍ പെരിങ്ങാട്ടുകുറിശ്ശി ഗ്രാമ പഞ്ചായത്ത് പ്രസിഡണ്ട് ശ്രീമതി രാധാമുരളീധരന്റെ അധ്യക്ഷതയില്‍ നടന്ന ചടങ്ങില്‍ ശതാബ്ധി ആഘോഷങ്ങളുടെ ഉദ്ഘാടനവും പൂര്‍വ്വ വിദ്യാര്‍ത്ഥി സംഗമവും നടന്നു. പാലക്കാട് ജില്ലാ പഞ്ചായത്ത് വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ ശ്രീ എസ് അബ്ദുല്‍റഹിമാന്‍ മാസ്റ്ററാണ് ശതാബ്ദി ആഘോഷങ്ങളുടെ ഉദ്ഘാടനം നടത്തിയത്. പ്രശസ്ത സര്‍ജനും വിശിഷ്ടസേവാമെഡല്‍ ജേതാവും സ്കൂളിലെ പൂര്‍വ്വവിദ്യാര്‍ത്ഥിയുമായ ഡോക്ടര്‍ സുഭാഷാണ് സംഗമം ഉത്ഘാടനം ചെയ്തത്. സ്കൂള്‍ ഹെഡ്‌മാസ്റ്റര്‍ ശ്രീ കെ എ ശിവദാസന്‍ സാര്‍ സ്വാഗതവും സ്റ്റാഫ് സെക്രട്ടറി ശ്രീ പി കുമാരന്‍ മാസ്റ്റര്‍ നന്ദിയും പറഞ്ഞു.

ഇനി ഓരോമാസവും ആസൂത്രണം ചെയ്തിട്ടുള്ള പരിപാടികള്‍ എന്തൊക്കെയാണെന്നോ..?

സെപ്തംബര്‍മാസം - പൊതുജനങ്ങള്‍ക്കുള്ള സൗജന്യ കണ്ണുപരിശോധന

ഒക്ടോബര്‍മാസം - സൗജന്യ രക്തഗ്രൂപ്പ് നിര്‍ണ്ണയ ക്യാമ്പ് ( Rare group blood data collection), ആരോഗ്യ ക്ലാസ്സുകള്‍

നവംബര്‍മാസം - വിദ്യാഭ്യാസ അവകാശ നിയമം ക്ലാസ്സ്, അമ്മമാര്‍ക്ക് കൗണ്‍സലിങ് ക്ലാസ്, പൂര്‍വ്വ വിദ്യാര്‍ത്ഥികളുടെ സഹകരണത്തോടെ നിര്‍മ്മിക്കുന്നശതാബ്ദിസ്മാരക സ്റ്റേജ് കം ക്ലാസ്റൂം തറക്കല്ലിടല്‍

ഡിസംബര്‍മാസം - കുട്ടികള്‍ക്ക് ക്വിസ് മല്‍സരം, സ്റ്റഡി ടൂര്‍, കൈയ്യെഴുത്ത് മാസിക - സുവനീര്‍ നിര്‍മ്മാണം

ജനുവരിമാസം - വിദ്യാഭ്യാസ സെമിനാര്‍, ഗുരുസമാഗമം, സ്കൂളിലേക്ക് ഒരു പുസ്തകം സമാഹരണം, വായനാമത്സരം, സ്കൂള്‍പത്രം

ഫെബ്രുവരി - ശതാബ്ദിസ്മാരക സ്റ്റേജ് കം ക്ലാസ്റൂം ഉത്ഘാടനം, ശതാബ്ദി ആഘോഷ സമാപനം

ഇതുപോലെ, അതിജീവനത്തിനായി വെമ്പിനില്‍ക്കുന്ന അനേകം പ്രാഥമിക പൊതുവിദ്യാലയങ്ങള്‍ നമ്മുടെ ചുറ്റുവട്ടത്തിലുണ്ടാകില്ലേ..? അവയെയൊക്കെ ഒന്ന് ഉയര്‍ത്തിയെടുക്കാന്‍ നമുക്ക് ഈ മാതൃക അവലംബിച്ചാലോ..?പ്രതികരണങ്ങള്‍ക്കായി കാക്കുന്നു.

പിന്‍കുറി : സോമന്‍കടവൂരിന്റെ കവിത
നിന്റെ മകന്‍ സെന്റ് തോമാ ഇംഗ്ലീഷ്മീഡിയത്തില്‍
എന്റെ മകള്‍ വിവേകാനന്ദ വിദ്യാഭവനില്‍
അവന്റെ മകനും മകളും ഇസ്ലാമിക് പബ്ലിക് സ്കൂളില്‍

ഒരേ ബഞ്ചിലിരുന്ന്
ഒരേ പാഠപുസ്തകം പങ്കിട്ട്
ഒരേ വിശപ്പ് വായിച്ച്
നമ്മള്‍ പഠിക്കാതെ പഠിച്ച
ആ പഴയ 'ഉസ്കൂള്‍' ഇപ്പോഴുമുണ്ട്

പണ്ടത്തെ നമ്മുടെ അച്ചനമ്മമാരെപ്പോലെ
പരമദരിദ്രരായ ചിലരുടെ മക്കള്‍
അവിടെ പഠിക്കുന്നുണ്ട്.
കുരിശും വാളും ശൂലവുമായി നമ്മുടെ മക്കള്‍
ഒരിക്കല്‍ കലി തുള്ളുമ്പോള്‍
നടുക്ക് വീണു തടുക്കുവാന്‍
അവരെങ്കിലും മിടുക്കരാകട്ടെ..!


Read More | തുടര്‍ന്നു വായിക്കുക

പി എഫ് ലോണ്‍ സഹായി

>> Saturday, August 11, 2012

സര്‍ക്കാര്‍ ജീവനക്കാര്‍ക്കും ,അധ്യാപകര്‍ക്കും പലപ്പോഴും തങ്ങളുടെ പ്രോവിഡണ്ട് ഫണ്ടില്‍ (GPF/KASEPF)നിന്നും വായ്പ എടുക്കേണ്ടതായി വരാറുണ്ടല്ലോ..? അത് ആലോചിക്കുന്നതുമുതല്‍ ട്രഷറിയില്‍ നിന്നും തുക ലഭിക്കുന്നതുവരേയുള്ള കാലയളവില്‍ നേരിടേണ്ടിവരുന്ന പ്രയാസങ്ങള്‍ പറഞ്ഞറിയിക്കേണ്ടതില്ല, പ്രത്യേകിച്ച് എയിഡഡ് സ്കൂളുകളിലും മറ്റും. ഫോമുകളൊക്കെ വാങ്ങി ക്ലാര്‍ക്കിനെ ഏല്‍പിക്കണം. അദ്ദേഹത്തിന്റെ സൗകര്യം പോലെ പൂരിപ്പിച്ച് പല ഫോമുകളിലേക്ക് തെറ്റാതെ പകര്‍ത്തി എഴുതണം, മേലധികാരി എഇഒ/ഡിഇഒ യ്ക്ക് ഫോര്‍വേഡ് ചെയ്യണം, ഇനി തുക കൂടുതലോ NRA ആണെങ്കിലോ? മേല്‍ ആപ്പീസിലേക്ക് വീണ്ടും പോണം, അവിടുത്തെ സൗകര്യങ്ങള്‍ക്കനുസരിച്ച് പല സെക്ഷന്‍ കറങ്ങി ഉത്തരവായി തിരിച്ചെത്തണം, ബില്‍ എഴുതി ട്രഷറിയിലെത്തിക്കണം....എന്തിനേറെപ്പറയുന്നൂ, മാതാവിന്റെ അസുഖത്തിന് അപേക്ഷിച്ചയാള്‍ക്ക് മരിച്ച്, ആണ്ടിനെങ്കിലും കിട്ടിയാല്‍ കിട്ടി!
ഇനി ഫോമുളെല്ലാം തയ്യാറാക്കുന്ന ജോലി വളരെ എളുപ്പം. സഹായിക്കാനെത്തുന്നത് ഇടുക്കി ഐടി@സ്കൂളിലെ ബഹുമാന്യ സുഹൃത്ത് റോയ് സാറാണ്. സ്പ്രെഡ്ഷീറ്റ് സോഫ്റ്റ്‌വെയറുപയോഗിച്ച് ഉബുണ്ടുവില്‍ നിഷ്പ്രയാസം പ്രവര്‍ത്തിപ്പിച്ച് ശരവേഗത്തില്‍ എല്ലാ ഫോമുകളും നമുക്ക് റെഡിയാക്കി പ്രന്റടുക്കാം..!GPF, KASEPF എന്നീ അക്കൗണ്ടുകളില്‍ നിന്നും PF Loan (Temp. Adv.) എടുക്കുന്നതിനാവശ്യമായ Application, Statement, Sanction, Bill എന്നിവ തയ്യാറാക്കുന്നതിന് ഉപയോഗിക്കാവുന്ന ഒരു spreadsheet program ആണ് Easy PF Calculator. ഉബുണ്ടുവില്‍ പ്രവര്‍ത്തിക്കുന്ന രീതിയിലാണ് ഇത് തയ്യാറാക്കിയിരിക്കുന്നത്. Data നല്‍കിയ ശേഷം ഒറ്റ ക്ലിക്കില്‍, നമുക്കാവശ്യമായ എല്ലാ രേഖകളും pdf ആയി ലഭിക്കുന്നു.

Easy PF Calculator 1.0

User Guide


GPF, KASEPF എന്നീ അക്കൗണ്ടുകളില്‍ നിന്നും PF Loan (Temp. Adv. & NRA എടുക്കുന്നതിനാവശ്യമായ Application, Statement, Sanction, Bill എന്നിവ തയ്യാറാക്കുന്നതിന് ഉപയോഗിക്കാവുന്ന ഒരു spreadsheet program ആണ് Easy PF Calculator. ഉബുണ്ടുവില്‍ പ്രവര്‍ത്തിക്കുന്ന രീതിയിലാണ് ഇത് തയ്യാറാക്കിയിരിക്കുന്നത്. Data നല്‍കിയ ശേഷം ഒറ്റ ക്ലിക്കില്‍, നമുക്കാവശ്യമായ എല്ലാ രേഖകളും pdf ആയി ലഭിക്കുന്നു. വിശദവിവരങ്ങള്‍ക്ക് User Guide കാണുക.

Easy PF Calculator – TA 1.1

Easy PF Calculator – NRA 1.1

User Guide

പിന്‍കുറി :NRA വായ്പയ്ക്ക് വേണ്ടിയുള്ള സഹായിയുടെ പണിപ്പുരയിലാണ് റോയ്സാര്‍. അത് ഉടനേതന്നെ നമുക്ക് പ്രതീക്ഷിക്കാം. സോഫ്റ്റ്‌വെയറിനകത്തെ ഹെല്‍പ്പ് ഫയലിനുള്ളിലുള്ള നിര്‍ദ്ദേശങ്ങള്‍ മനസ്സിലാക്കിയാല്‍ നമുക്കും ഇതുപോലുള്ള സഹായികള്‍ രൂപപ്പെടുത്താവുന്നതും മറ്റുള്ളവര്‍ക്ക് കൈമാറാവുന്നതുമുള്ളൂ. പക്ഷേ..?


Read More | തുടര്‍ന്നു വായിക്കുക

സമാന്തരശ്രേണി: ഈ ചോദ്യം കുഴക്കുമോ?

>> Thursday, August 9, 2012

മാത്‍സ് ബ്ലോഗിലൂടെ കേരളം കണ്ട മിടുക്കരായ ഗണിതാധ്യാപകരില്‍ ഒരാളാണ് മുരളീധരന്‍ മാഷ്. മാത്‍സ് ബ്ലോഗിന്റെ ആരംഭ ദശയില്‍ ഏതൊരു ഗണിതപ്രശ്നം ചര്‍ച്ചയ്ക്കെടുത്താലും അതിന് ആദ്യം ഉത്തരമെഴുതുക അദ്ദേഹമായിരിക്കും. അദ്ദേഹത്തിന്റെ അസാമാന്യമായ പാടവം കൊണ്ടു തന്നെ അദ്ദേഹത്തെ മാത്‍സ് ബ്ലോഗ് ടീമിലേക്ക് ഉള്‍പ്പെടുത്തുകയായിരുന്നു. വ്യത്യസ്തമായ ചിന്തയില്‍ അഗ്രഗണനീയനായതു കൊണ്ടു തന്നെ അദ്ദേഹം അയച്ചു തന്ന ചോദ്യം സസന്തോഷം മാത്സ് ബ്ലോഗില്‍ ചര്‍ച്ചയ്കിടുന്നു. അതോടൊപ്പം വിപിന്‍ മഹാത്മ തയ്യാറാക്കി അയച്ചു തന്ന സമാന്തരശ്രേണിയുടെ മനോഹരമായൊരു വര്‍ക്ക് ഷീറ്റ് താഴെ നല്‍കിയിട്ടുണ്ട്. കൂടാതെ ഇതേ അധ്യായവുമായി ബന്ധപ്പെട്ട് അങ്ങാടിപ്പുറം ദേവന്‍സ് മെമ്മോറിയല്‍ ഇന്‍സ്റ്റിറ്റ്യൂട്ടിലെ അധ്യാപകനായ അരുണ്‍ബാബു സാര്‍ തയ്യാറാക്കിത്തന്ന മലയാളം, ഇംഗ്ലീഷ് മീഡിയങ്ങളിലേക്കു വേണ്ട സമാന്തരശ്രേണിയിലെ ചോദ്യങ്ങളും കാണാം. ചുവടെ നിന്നവ ഡൌണ്‍ലോഡ് ചെയ്തെടുക്കാം. നോക്കുമല്ലോ. മുരളി സാര്‍ ഉന്നയിച്ച പ്രശ്നം പരിഹരിക്കാന്‍ എത്ര പേര്‍ക്കു കഴിയുമെന്നറിയാന്‍ കാത്തിരിക്കുന്നു.

പത്താം ക്ലാസിലെ ടെക്സ്റ്റിലെ അവസാന പ്രശ്നം അവതരിപ്പിക്കുകയാണ് നമ്മുടെ കണക്കു ടീച്ചര്‍. പ്രശ്നം ഇതാണ്. "ഒരു സമാന്തരശ്രേണിയുടെ ഒന്നാം പദവും രണ്ടാം പദവും തമ്മിലുള്ള അംശബന്ധം 2:3 ആണ്. എങ്കില്‍ ആ ശ്രേണിയിലെ മൂന്നാം പദവും അഞ്ചാം പദവും തമ്മിലുള്ള അംശബന്ധം എത്രയായിരിക്കും?"
പ്രശ്നത്തിന്റെ പരിഹാരം 2:3 എന്ന് എല്ലാവര്‍ക്കും ബോധ്യമായി. ഇതേ അംശബന്ധം വരുന്ന മറ്റുപദങ്ങള്‍ ഈ ശ്രേണിയില്‍ ഉണ്ടാകുമോ എന്ന് ടീച്ചര്‍ ചോദിച്ചു. മറുപടി കിട്ടാതിരുന്നപ്പോള്‍ ടീച്ചര്‍ പറഞ്ഞു. അഞ്ചാം പദവും എട്ടാം പദവും തമ്മിലുള്ള അംശബന്ധം കണ്ടു നോക്കൂ. അതും 2:3 എന്നു തന്നെ ഉത്തരം കിട്ടി.
7-ം പദവും 11-ം പദവും തമ്മിലുള്ളതോ? അതും 2:3 തന്നെ. ഇവയെല്ലാം ടീച്ചര്‍ പട്ടികപ്പെടുത്തി.
$x_1:x_2 = 2:3$
$x_3:x_5 = 2:3$
$x_5:x_8 = 2:3$
$x_7:x_{11}= 2:3$

പദങ്ങളുടെ പ്രത്യേകത കുട്ടികള്‍ക്ക് ബോധ്യപ്പെടുത്തിയതിനു ശേഷം ടീച്ചര്‍ ഇതിനെ സാമാന്യവല്ക്കരിച്ചു.
$x_1, x_2, x_3\cdots$ എന്നിങ്ങനെയുള്ള ഒരു സമാന്തരശ്രേണിയില്‍
$x_m:x_n = p:q$ ആണെങ്കില്‍ $x_{m+p}:x_{n+q} = p:q$ തന്നെ ആയിരിക്കും.
ഏതു സമാന്തരശ്രേണിയിലും ഇത് ശരിയായിരിക്കുമോ? ശരത്തിന് ഒരു സംശയം.
നമുക്ക് നോക്കാം എന്ന് ടീച്ചര്‍ പറഞ്ഞു.
$x_m:x_n = p:q $ആണെങ്കില്‍
$x_m = pk$ എന്നും $x_n=qk$ എന്നും എടുക്കാമല്ലോ.
അതിനാല്‍ $x_{m+p}\times$ പൊതുവ്യത്യാസം $= pk+pd = p(k+d)$
ഇതുപോലെ
$x_n+q= xn+q \times$ പൊതുവ്യത്യാസം $= qk+qd = q(k+d)$
അതിനാല്‍ $x_m+p:x_n+q= p:q$ തന്നെ ആകുമല്ലോ.
ഇനി നിങ്ങള്‍ ഒരു സമാന്തരശ്രേണി എഴുതി ഇത് ശരിയാകുമോ എന്ന് പരിശോധിച്ചു നോക്കൂ. അതായത് ഇഷ്ടമുള്ള 2 പദങ്ങള്‍ തമ്മിലുള്ള അംശബന്ധം എടുക്കുക. ഇത് മുകളില്‍ കാണിച്ചതു പോലുള്ള പദങ്ങള്‍ക്ക് ശരിയാകുമോ എന്നു നോക്കൂ.

കുറച്ചു സമയത്തിനു ശേഷം ശരത് എഴുന്നേറ്റു. ഞാന്‍ എടുത്ത ശ്രേണിയില്‍ ഇത് ശരിയാകുന്നില്ലല്ലോ ടീച്ചര്‍?
ചെയ്തതെവിടെയങ്കിലും തെറ്റിയിട്ടുണ്ടായിരിക്കും. അല്ലെങ്കില്‍ എടുത്തത് സമാന്തരശ്രേണി ആയിരിക്കില്ല. എന്നായി ടീച്ചര്‍.
എന്റെ ശ്രേണിയിലെ മൂന്നാം പദവും എട്ടാം പദവും തമ്മിലുള്ള അംശബന്ധം $7:2$ ആണ്. അങ്ങിനെയാണെങ്കില്‍ പത്താം പദവും പപത്താം പദവും തമ്മിലുള്ള അംശബന്ധം $7:2$ ആയിരിക്കേണ്ടേ? അതു ശരിയല്ലല്ലോ. ഒരു പദം അതിനോടു തന്നെയുള്ള അംശബന്ധം $1:1$ അല്ലേ.
ടീച്ചര്‍ പെട്ടന്ന് അന്തം വിട്ടു. എല്ലാ സമാന്തരശ്രേണിക്കും ഇത് ശരിയാകുമെന്ന് നേരത്തേ കണ്ടെത്തിയതാണല്ലോ. ശരത്ത് എടുത്തിരിക്കുന്നത് സമാന്തരശ്രേണി തന്നെയല്ലേ എന്ന് ടീച്ചര്‍ പരിശോധിച്ചു. ശരി തന്നെ. പിന്നെന്തേ ഇങ്ങനെ വരാന്‍?

കണക്കില്‍ മിടുക്കിയായ ഹിത അപ്പോള്‍ ഇടപെട്ടു. $14:4$ ഉം $7:2$ ഉം തന്നെയാണല്ലോ. അതു കൊണ്ട് $7:2$ നു പകരം $14:4$ എന്നെടുത്താല്‍ പോരേ?

അപ്പോഴും ടീച്ചറുടെ ചിന്ത പത്താം പദത്തിലായിരുന്നു. ഈ പദത്തിന് എന്തു കൊണ്ടിതു ശരിയാകുന്നില്ല എന്ന് ടീച്ചറുടെ മനസ്സില്‍ ചോദ്യം പ്രകമ്പനം കൊണ്ടിരുന്നു. അപ്പോഴേക്കും ബെല്ലടിച്ചു. ഈ പത്താം പദത്തിനെന്താ കൊമ്പുണ്ടോ? അവനെ കണ്ടെത്തിയിട്ടു തന്നെ ബാക്കി കാര്യം എന്നു പിറുപിറുത്തു കൊണ്ട് ടീച്ചര്‍ സ്റ്റാഫ് റൂമിലേക്ക് നീങ്ങി. ആരായിരിക്കും ഈ പത്താം പദം? ഉത്തരം കണ്ടെത്തി കമന്റ് ചെയ്യുമല്ലോ. അഭിപ്രായങ്ങള്‍ പ്രതീക്ഷിക്കുന്നു.

Click here for download the work sheet from Arithmetic Progression
Prepared By Vipinkumar, Mahatma

Click here to download Questions from Arithmetic Progression
Malayalam Medium | English Medium
Prepared By Arunbabu. R, Devans memorial Institute, Angadippuram


Read More | തുടര്‍ന്നു വായിക്കുക

എട്ടാംക്ലാസ് ICT പാഠങ്ങള്‍

>> Monday, August 6, 2012

രാജീവ് ജോസഫ് , ജിംജോ ജോസഫ് എന്നീ അദ്ധ്യാപകര്‍ തയ്യാറാക്കിയ എട്ടാംക്ലാസ് IT പാഠങ്ങളാണ് ഇന്നത്തെ പോസ്റ്റ്. എട്ടാംക്ലാസിലെ പാഠങ്ങള്‍ക്കും പത്തിലേതുപോലെ നോട്ടുകള്‍ വേണമെന്ന പലരുടെയും ആവശ്യമാണ് ബഹുമാന്യരായ രണ്ട് അധ്യാപകര്‍ നിറവേറ്റിയത് . ബ്ലോഗ് ടീമിന്റെ പേരില്‍ അവരുടെ പ്രയത്നങ്ങളെ അഭിനന്ദിക്കുന്നു.

ഭാവി തലമുറയെ നേര്‍വഴിക്ക് നടത്തുവാന്‍ തിരഞ്ഞെടുക്കപ്പെട്ടിരിക്കുന്ന നമുക്ക്, കമ്പ്യൂട്ടറുകളും അനുബന്ധ ഉപകരണങ്ങളും അനായാസം കൈകാര്യം ചെയ്യുന്നതിനുള്ള കഴിവ് ഉണ്ടായിരിക്കേണ്ടത് വിജ്ഞാന സമ്പാദനത്തിനും വിനിമയത്തിനും ഇന്ന് വളരെ അത്യാവശ്യമാണ്. മാത്രമല്ല നമ്മുടെ ചുറ്റുപാടും സംഭവിക്കുന്ന മാറ്റങ്ങളെ സൂക്ഷ്മമായി നിരീക്ഷിക്കുന്നതിനും വിശകലനം ചെയ്യുന്നതിനും വൈവിധ്യമുള്ളതും രസകരവുമായ അനുഭവങ്ങളിലൂടെ അറിവിന്റെ നിര്‍മാണം നടക്കുന്നതിനും വിവര സാങ്കേതിക വിദ്യ ഏറെ സഹായകമാണ്.


കേവലം സാങ്കേതിക വിദ്യാ പഠനം മാത്രമായി ചുരുക്കുന്ന തരത്തിലല്ല ഇപ്പോഴത്തെ നമ്മുടെ ഐ.ടി. പാഠപുസ്തകങ്ങള്‍. മറിച്ച് ഐ.റ്റി.യുടെ സാധ്യതകള്‍ ഉപയോഗപ്പെടുത്തി പഠനപ്രക്രിയയുടെ ഗുണമേന്മ മൊത്തത്തില്‍ വര്‍ദ്ധിപ്പിക്കുവാനും സ്വയം പഠനത്തിനു സഹായിക്കുന്ന തരത്തിലുമാണ് അവ ചിട്ടപ്പെടുത്തിയിരിക്കുന്നത്‌.

ചിത്രരചനാ പരിശീലനത്തിനായി GIMP, സമയ മേഖലകള്‍ മനസ്സിലാക്കാന്‍ Sunclock, ഏറ്റവും ഉപകാരപ്രദമായ Word Processor, വിജ്ഞാനത്തിന്റെ മഹാസാഗരമായ Internet- നെ പരിചയപ്പെടല്‍, രസതന്ത്ര പഠനം എളുപ്പമാക്കാന്‍ Kalzium, Ghemical എന്നിവ, സോഫ്റ്റ്വെയര്‍ സാങ്കേതിക വിദ്യയുടെ ബാലപാഠങ്ങള്‍ കളികളിലൂടെ പഠിക്കുന്നതിന് Kaliyalla Kaaryam, ജ്യാമിതീയ നിര്‍മ്മിതികള്‍ എളുപ്പമാക്കാന്‍ Geogebra, വിവരങ്ങള്‍ പട്ടികയാക്കുക, ക്രോഡീകരിക്കുക, അപഗ്രഥിക്കുക തുടങ്ങിയ പ്രവര്‍ത്തനങ്ങള്‍ ആയാസരഹിതമാക്കാന്‍ Spreadsheet, ഭൂപട പഠനത്തിനായി Marble, Xrmap എന്നിവ, നമ്മുടെ കണ്ടെത്തലുകള്‍ ആശയങ്ങള്‍, നിർദ്ദേശങ്ങള്‍ തുടങ്ങിയവ മറ്റുള്ളവരുടെ മുമ്പില്‍ ആകര്‍ഷകമായി അവതരിപ്പിക്കുവാന്‍ സഹായിക്കുന്ന Presentation സോഫ്റ്റെയര്‍, ആകാശ കാഴ്ച്ചകള്‍ നിരീക്ഷിക്കാനുതകുന്ന KStars എന്നീ സോഫ്റ്റെയറുകള്‍ ആണ് എട്ടാം ക്ലാസിൽ പരിചയപ്പെടുത്തുന്നത്.

കൂടുതല്‍ അന്വേഷണങ്ങളിലൂടെയും പരീക്ഷണങ്ങളിലൂടെയും പാഠപുസ്തകത്തിനും അപ്പുറത്തേയ്ക്ക് പോകുന്നതിന് പ്രേരണ ഉണ്ടാകട്ടെ എന്ന് ആശംസിച്ചുകൊണ്ട് അധ്യാപകര്‍ക്കും വിദ്യാര്‍ത്ഥികള്‍ക്കും സഹായകമാകുന്ന വിധത്തില്‍ ആദ്യ ആറ് പാഠങ്ങളുടെ നോട്സ് പ്രസിദ്ധീകരിക്കുന്നു. അവ പൂര്‍ണ്ണമല്ല എന്ന് പ്രത്യേകം പറയേണ്ടതില്ലല്ലോ... അഭിപ്രായങ്ങളും നിര്‍ദ്ദേശങ്ങളും കമന്റ്സ് ആയെത്തുമ്പോള്‍ അവ കുറ്റമറ്റതാക്കാം എന്ന് കരുതുന്നു.

VIII -ICT notes : Chapter 1
VIII -ICT notes : Chapter 2
VIII -ICT notes : Chapter 3
VIII -ICT notes : Chapter 4
VIII-ICT notes : Chapter 5
VIII -ICT notes : Chapter 6


Read More | തുടര്‍ന്നു വായിക്കുക

ഗണിതശാസ്ത്രവര്‍ഷം - സ്ക്കൂള്‍ തല പ്രവര്‍ത്തനങ്ങള്‍

>> Sunday, August 5, 2012

മാത്‌സ് ബ്ളോഗിലെ സന്ദര്‍ശകര്‍ക്ക് 2012 ന്റെ പ്രാധാന്യം - ദേശീയഗണിതവര്‍ഷം- ഒട്ടും തന്നെ വിശദീകരിക്കേണ്ടതില്ല. ഗണിതം, ഭാരതീയഗണിതശാസ്ത്ര ചരിത്രം, ശ്രീനിവാസരാമാനുജന്‍ തുടങ്ങിയ സംഗതികളൊന്നും അതുകൊണ്ടുതന്നെ വിസ്തരിക്കുന്നുമില്ല. ഒരൊറ്റക്കാര്യം മാത്രമാണിവിടെ സ്പര്‍ശിക്കുന്നത്. മറ്റെതൊരു ദിനാചരണം പോലെയും ദേശീയ ഗണിതവര്‍ഷം മാത്സ്ബ്ളോഗിലൂടെയെങ്കിലും വെറും ആചരണമയി കടന്നുപോയിക്കൂടാ. ഒക്കെ 'കണക്കെന്ന്' പറയിപ്പിച്ചുകൂടാ. ഈ വര്‍ഷം നമുക്കെന്തെല്ലാം ചെയ്യാന്‍ കഴിയും?

രണ്ടുതലങ്ങളില്‍ നമുക്കീ കാര്യം ആലോചിക്കാം
  • ഗണിതശാസ്ത്രത്തിന്റെ ചരിത്രവും പ്രാധാന്യവും സാധാരണക്കാരുമായി പങ്കുവെക്കുക
  • ഗണിതപഠനത്തില്‍ കുട്ടികളുടെ അഭിരുചി അത്യധികം വര്‍ദ്ധിപ്പിക്കുക.
സാധാരണക്കാര്‍ക്ക് [ അദ്ധ്യാപകസമൂഹത്തില്‍ പോലും ] കണക്ക് എന്തോ അകലെക്കിടക്കുന്ന ഒരു ഭൂഖണ്ഡം പോലെയാണ്`. അതുകൊണ്ടുതന്നെ അപ്രാപ്യമെന്നും അഗ്രാഹ്യമെന്നും കരുതുകയാണ്`. കണക്കിന്റെ ചരിത്രവുമായി ബന്ധപ്പെടുമ്പോള്‍ മാത്രമാണ്` [ നിത്യജീവിതത്തിലെ പ്രാധാന്യവും ] ഈ അകല്‍ച്ച മാറിപ്പോകുന്നത്. ഭാരതീയരും വിദേശീയരുമായ ഗണിതശാസ്ത്രജ്ഞരുടെ ജീവിതവും അതത് കാലത്തെ സാമൂഹ്യാവസ്ഥകളും മനസ്സിലാകുന്നതോടെ കണക്കിനുള്ള ഈ മായികഭാവം ഇല്ലാതാകും. പേരെടുത്ത് പറയാതെതന്നെ ഏതു ശാസ്ത്രജ്ഞനും തുടക്കത്തില്‍ സാധാരണക്കാരനായിരുന്നുവെന്നും വിഷയത്തിലുള്ള അതിയായ താല്പ്പര്യം [ അറിവിന്റെ സുഖം] , കൂടുതല്‍ അറിയാനുള്ള അഭിനിവേശം , [അറിഞ്ഞോ അറിയാതെയോ ഒരാളില്‍ നിലനില്‍ക്കുന്ന] സാമൂഹ്യമായ പ്രതിബദ്ധത എന്നിവയൊക്കെയാണ്` അവരെ അസാധാരണരാക്കിയെന്നതും ആണല്ലോ വസ്തുത. ഏതു സാധാരണക്കാരനും കടന്നുചെല്ലാവുന്ന പടിവാതിലുകളാണ്` ശാസ്ത്രങ്ങള്‍ക്കൊക്കെയും [ അറിവിനൊക്കെയും] എന്ന മഹാസത്യം ചരിത്രത്തിന്ന് വിശദീകരിച്ചുകൊടുക്കാന്‍ കഴിയും .

കുട്ടികളുടെ അഭിരുചി വര്‍ദ്ധിപ്പിക്കുന്നതിനും ഈ ഒരു വഴി പ്രയോജനപ്പെടുത്താം.ഗണിതം ഒരു പരീക്ഷാവസ്തു വെന്ന നിലയിലായിരിക്കരുത് ഇടപെടല്‍. കണക്കുക്ളാസിലെ പ്രതിപാദ്യം എന്നുമായിക്കൂടാ. ഇതില്‍ ആദ്യം സ്വയം നവീകരിക്കേണ്ടത് കണക്ക് മാഷ് തന്നെയാവും പലപ്പോഴും. ബോധനത്തില്‍ വന്ന മാറ്റം ശരിയായി പ്രയോഗിക്കപ്പെടാന്‍ സാധിക്കണം.

രണ്ടുതരത്തില്‍ ഈ കാര്യങ്ങളില്‍ ഇടപെടല്‍ നടത്താമെന്നു തോന്നുന്നു.

  • ബ്ളോഗ് ടീം നേരിട്ട് ചെയ്യുന്ന പ്രവര്‍ത്തനങ്ങള്‍
  • ബോഗിലൂടെ പ്രക്ഷേപണം ചെയ്യുന്ന പ്രേരണകള്‍

അവയേതെല്ലാമെന്ന് നമുക്ക് നോക്കാം. കൂട്ടിച്ചേര്‍ക്കേണ്ടവ കമന്റിലൂടെ ചര്‍ച്ചയ്ക്കു വന്നാല്‍ അതു കൂടി ഉള്‍പ്പെടുത്താം.
  1. ഏതൊരു പോസ്റ്റിലും അന്തര്‍ലീനമായിരിക്കുന്ന ഒരു ഗണിത ഘടകമുണ്ടല്ലോ. അത് ചര്‍ച്ചക്ക് നല്കണം. ചിലപ്പോള്‍ അത് നിസ്സാരമായ ഒന്നാകാം. പലപ്പോഴും ഗൗരവപ്പെട്ടതും. അത് കണ്ടെത്താനും ചര്‍ച്ചക്ക് വെക്കാനും കഴിയുമോ എന്നതാണ് ടീം എറ്റെടുക്കുന്ന വെല്ലുവിളി. ഭാഷയേപ്പോലും, ഒരു സര്‍ക്കാര്‍ ഉത്തരവ് പോലും mathematize ചെയ്യാന്‍ കഴിയുക എന്നര്‍ഥം. നമ്മുടെ ക്ളാസുകളില്‍ ഗണിതത്തെപ്പോലും ഭാഷീകരിക്കയാണല്ലോ ചെയ്തുവരുന്നത് എന്നാലോചിക്കുമ്പോള്‍ വളരെ സുപ്രധാനമായ ഒരു ക്രിയാരൂപമാകും ഇത്.
  2. ഗണിതസമസ്യകളുടെ ചരിത്രപരമായ , സാമൂഹ്യമായ മാനങ്ങള്‍ വിശദമാക്കുന്ന കുറിപ്പുകള്‍ ആലോചിക്കാവുന്നതണ്`.
  3. മിടുക്കരായ അധ്യാപകരേയും കുട്ടികളേയും സംബോധനചെയ്യുന്ന ക്വിസ്സ്, പ്രഹേളികകള്‍, പ്രശ്നങ്ങള്‍ എന്നിവ തുടര്‍ച്ചയായി നല്കാന്‍ കഴിയുമോ എന്നാലോചിക്കാം .
  4. നമ്മുടെ ഭൂരിപക്ഷം പോസ്റ്റുകളും ബ്ലോഗ്ഗ്- നെറ്റ് സാധ്യതകള്‍ പ്രയോജനപ്പെടുത്തുന്നില്ല . നോട്ട് ബുക്കില്‍ എഴുതുന്നതിനു പകരം വെബ്ബ് പേജില്‍ എഴുതുന്നു എന്നേ ഉള്ളൂ. ലിങ്കുകളുടെ പ്രയോജനം 99% പോസ്റ്റിലും ഇല്ല. അതുകൊണ്ടുതന്നെ വെബ്ബ് പരമായ ആധികാരികത ഉണ്ടാക്കാനവുന്നില്ല. വിക്കി നോക്കിയാല്‍ ഇതറിയാം. അറിവിന്റെ വിശാലതകളില്‍ നമ്മുടെ സന്ദര്‍ശകരെ എത്തിച്ചേ മതിയാവൂ.
  5. നമ്മുടെ നിത്യസന്ദര്‍ശകരായ ഗണിതപ്രിയന്‍മാര്‍പോലും സ്വയം സൃഷ്ടികളില്‍ ഏര്‍പ്പെടുന്നില്ല. പലരും ഉപഭോക്താക്കള്‍ മാത്രമാണ്`. [ഒരു കോടി ഉപഭോക്താക്കള്‍ എന്ന ഹിറ്റ് കണക്ക് സ്വയം വിലയിരുത്തലായിട്ടല്ല ; ഉപഭോക്തൃഭാവത്തെ ചോദ്യം ചെയ്യുന്നതായിക്കൂടി എണ്ണിയേ തീരൂ എന്നു തോന്നുന്നില്ലേ? ] ഉപഭോക്താക്കള്‍ ഉല്‍പ്പാദകരാവുകകൂടി ചെയ്യാന്‍ നമ്മുടെ പോസ്റ്റുകള്‍ പ്രയോജനപ്പെടണം. ട്വിറ്റര്‍ പോലുള്ള മാധ്യമങ്ങള്‍ മാതൃകയാക്കാവുന്നതാണ്`..
  6. സ്കൂള്‍ തലത്തില്‍ കുട്ടികള്‍ക്ക് ഒറ്റക്കും ഗ്രൂപ്പായും [ ക്ളാസിലും, ക്ളബ്ബിലും] ചെയ്യാവുന്ന ഗണിതപ്രവര്‍ത്തനങ്ങള്‍ - [ പാഠഭാഗങ്ങള്‍ കൂടുതല്‍ മനസ്സിലാക്കുന്നതിനായും ആസ്വദിക്കുന്നതിനായും ഉള്ളവ ] കണ്ടെത്തി നല്‍കാന്‍ കഴിയണം. ഗണിതത്തിന്റെ ആസ്വാദനനത്തിന്ന്- സൗന്ദര്യാംശത്തിന്ന് അധിക ഊന്നല്‍ ആവാം.
  7. മിടുക്കരായ അദ്ധ്യാപകര്‍ക്ക് വെല്ലുവിളി ഏറ്റെടുക്കുന്ന തരത്തില്‍ ഇടപെടാവുന്ന സമസ്യകള്‍, പ്രശ്നങ്ങള്‍... കണ്ടെത്തി നല്‍കാന്‍ കഴിയണം. അവരുടെ കണ്ടെത്തലുകള്‍ പ്രസിദ്ധീകരിക്കാന്‍ പ്രത്യേക പേജ് നീക്കിവെക്കണം.
  8. നിത്യജീവിതവുമായി ബന്ധപ്പെട്ട ഗണിതാത്മക വിഷയങ്ങള്‍ ആലോചിക്കാം. പെട്റോള്‍ വില വര്‍ദ്ധന, രൂപയുടെ വിലമാറ്റം, സബ്സിഡി... സ്വര്‍ണ്ണവില.... എന്നിങ്ങനെ. ഗണിതം സമൂഹവുമായി ബന്ധപ്പെടുന്ന ഇടങ്ങള്‍...
ഒരുകോടി സന്ദര്‍ശകര്‍ വലിയ ശക്തിയാണ്. അവര്‍ വെറും സന്ദര്‍ശകരായിരിക്കരുത് ഇനിയും. ഇടപെടാനുള്ള അവസരം ക്രിയാത്മകമായി ഒരുക്കാന്‍ ഈ ശക്തി തന്നെ നമുക്ക് സഹായകമാവും. ഒരിക്കല്‍ ബ്ളോഗ് സന്ദര്‍ശിക്കുന്ന ഒരാള്‍ക്ക് ഒരു പോസ്റ്റ് വായിച്ചു കഴിഞ്ഞാല്‍ ഒരു കമ്ന്റിടുന്നതിന്നപ്പുറത്തേക്ക് എന്തെങ്കിലും ചെയ്തേ പറ്റൂ എന്ന ആവേശം ഉല്പ്പാദിപ്പിക്കാനാവുമോ എന്നായിരിക്കും 'ഒരു കോടി' യുടെ വെല്ലുവിളി. . ഇതാകും 'ദേശീയ ഗണിതവര്‍ഷത്തില്‍ നമുക്ക് ഏറ്റെടുക്കാനാവുക..

ശതകോടി ആശംസകളോടെ
എസ്.വി. രാമനുണ്ണി മാസ്റ്റര്‍
മാത്​സ് ബ്ലോഗ് ടീം


Read More | തുടര്‍ന്നു വായിക്കുക
♡Copy the contents with due courtsey. Admins: Harikumar K G, SDPY KPMHS Edavanakad, V K Nizar. HIHSS Edavanakad | Disclaimer